Poetry

maze jahān ke apnī nazar meñ ḳhaak nahīñ sivā.e ḳhūn-e-jigar so jigar meñ ḳhaak nahīñ

jāda-e-rah ḳhur ko vaqt-e-shām hai tār-e-shuā.a charḳh vā kartā hai māh-e-nau se āġhosh-e-vidā.a

har ek baat pe kahte ho tum ki tū kyā hai tumhīñ kaho ki ye andāz-e-guftugū kyā hai

jab tak dahān-e-zaḳhm na paidā kare koī mushkil ki tujh se rāh-e-suḳhan vā kare koī

har qadam dūrī-e-manzil hai numāyāñ mujh se merī raftār se bhāge hai bayābāñ mujh se

jahāñ terā naqsh-e-qadam dekhte haiñ ḳhayābāñ ḳhayābāñ iram dekhte haiñ

harīf-e-matlab-e-mushkil nahīñ fusūn-e-niyāz duā qubūl ho yā rab ki umr-e-ḳhizr darāz

jarāhat-tohfa almās-armuġhāñ dāġh-e-jigar hadiya mubārakbād 'asad' ġham-ḳhvār-e-jān-e-dardmand aayā

hasad se dil agar afsurda hai garm-e-tamāshā ho ki chashm-e-tañg shāyad kasrat-e-nazzāra se vā ho

jaur se baaz aa.e par baaz aa.eñ kyā kahte haiñ ham tujh ko muñh dikhlā.eñ kyā

havas ko hai nashāt-e-kār kyā kyā na ho marnā to jiine kā mazā kyā

jis bazm meñ tū naaz se guftār meñ aave jaañ kālbad-e-sūrat-e-dīvār meñ aave

hazāroñ ḳhvāhisheñ aisī ki har ḳhvāhish pe dam nikle bahut nikle mire armān lekin phir bhī kam nikle

jis jā nasīm shānā-kash-e-zulf-e-yār hai naafā dimāġh-e-āhu-e-dasht-e-tatār hai

huī tāḳhīr to kuchh bā.is-e-tāḳhīr bhī thā aap aate the magar koī ināñ-gīr bhī thā

junūñ kī dast-gīrī kis se ho gar ho na uryānī garebāñ-chāk kā haq ho gayā hai merī gardan par

hujūm-e-ġham se yaañ tak sar-nigūnī mujh ko hāsil hai ki tār-e-dāman o tār-e-nazar meñ farq mushkil hai

juz qais aur koī na aayā ba-rū-e-kār sahrā magar ba-tañgi-e-chashm-e-hasūd thā

husn-e-mah garche ba-hañgām-e-kamāl achchhā hai us se merā mah-e-ḳhurshīd-jamāl achchhā hai

kab vo suntā hai kahānī merī aur phir vo bhī zabānī merī

husn ġhamze kī kashākash se chhuTā mere ba.ad baare ārām se haiñ ahl-e-jafā mere ba.ad

kabhī nekī bhī us ke jī meñ gar aa jaa.e hai mujh se jafā.eñ kar ke apnī yaad sharmā jaa.e hai mujh se

huzūr-e-shāh meñ ahl-e-suḳhan kī āzmā.ish hai chaman meñ ḳhush-navāyan-e-chaman kī āzmā.ish hai

ibn-e-mariyam huā kare koī mere dukh kī davā kare koī