gulshan meñ bandobast ba –rañg –e –digar hai aaj
qumrī kā tauq halqa –e –bairūn –e –dar hai aaj
aatā hai ek pāra –e –dil har fuġhāñ ke saath
tār –e –nafas kamand –e –shikār –e –asar hai aaj
ai āfiyat kināra kar ai intizām chal
sailāb –e –girya darpai –e –dīvār –o –dar hai aaj
ma .azūlī –e –tapish huī ifrāt –e –intizār
chashm –e –kushāda halqa –e –bairūn –e –dar hai aaj
hairat –farosh –e –sad –nigarānī hai iztirār
sar –rishta chāk –e –jeb kā tār –e –nazar hai aaj
huuñ dāġh –e –nīm –rañgī –e –shām –e –visāl –e –yār
nūr –e –charāġh –e –bazm se josh –e –sahar hai aaj
kartī hai ājizī –e –safar soḳhtan tamām
pairāhan –e –ḳhasak meñ ġhubār –e –sharar hai aaj
tā –sub .h hai ba –manzil –e –maqsad rasīdanī
dūd –e –charāġh –e –ḳhāna ġhubār –e –safar hai aaj
dūr –ūftāda –e –chaman –e –fikr hai 'asad'
murġh –e –ḳhayāl bulbul –e –be –bāl –o –par hai aaj
Source & attribution User-supplied Urdu corpus: urdu_ghazals_30_poets_multilingual.json. Poet: Mirza Ghalib. Dataset poem: gulshan-men-bandobast-ba-rang-e-digar-hai-aaj-mirza-ghalib-ghazals. The source credits Rekhta. Roman text is Urdu transliteration, not an English translation.
×